English | Íslenska 0 hlutir í körfunni, samtals 0 Kr.
Fróðleikur um ána
Litlaá í Kelduhverfi er bergvatnsá, sem upprunalega átti sér eingöngu upptök í lindum sem heita Brunnar við bæinn Keldunes.  Frá 1976 á hún sér einnig upptök í Skjálftavatni en það myndaðist við jarðsig í Kröflueldum. Vatnið úr Brunnum er óvenju heitt og blandast kaldara vatni úr Skjálftavatni, þannig er meðalhiti vatnsins í ánni um 12°C. Vaxtahraði fiska í Litluá er mikill undir þessum kringumstæðum og er sjóbirtingsstofn árinnar því einn sá stærsti hér á landi. Auk sjóbirtings og staðbundins urriða veiðist nokkuð magn af sjóbleikju og einnig er von um lax í Litluá. Árið 2004 kom á land stærsti sjóbirtingur landsins, 23 punda ferlíki. Er mál manna að nokkrir slíkir haldi jafnan til í ánni, jafnvel stærri.

Staðsetning: Norðausturland - um 10 km vestan við Ásbyrgi í Kelduhverfi, um 55 km austan við Húsavík.

Veiðisvæði: Sex veiðisvæði eru í ánni sem skiptast á 5 stangir. Stærstu sjóbirtingarnir hafa veiðst í ofanverðri ánni. Í Litluá er bæði að finna fallegar flúðir, hylji, breiður og hólma.

Stangafjöldi: 5 stangir í Litluá og 2 stangir í Skjálftavatni.

Seld holl/dagar: Seldar stangir í hollum og stakar, heill eða hálfur dagur.

Tímabil: 1. apríl - 10. október

Daglegur veiðitími:
1. til 30. apríl: 9-21
1. maí til 15. september: 7-13 og 16-22, seinni vaktin með +/-3 klst. sveigjanleika (heild 6 tímar).
16. september til 10. október: 8-20

Leyfilegt agn: Eingöngu veitt á flugu.

Veiðitilhögun: Eingöngu veiða/sleppa.

Hentugustu veiðitæki: Einhenda 5-7.

Bestu flugur: Black Ghost, Dentist, Heimasæta, Dýrbítur, ýmsir Nobblerar, púpur, lirfueftirlíkingar og þurrflugur.

Staðhættir og aðgengi: Veiðistaðirnir eru flestir vel aðgengilegir en betra er að hafa jeppa á neðri svæðunum.

Gistiaðstaða: Frá gistihúsinu í Keldunesi þarf ekki einu sinni að keyra út á þjóðveg til að fara að Litluá. Þarna má finna heitan pott, 6 tveggja manna herbergi með uppábúnum rúmum. Notaleg borðstofa og sjónvarpsstofa ásamt mjög góðri eldunaraðstöðu. Valkostur er að kaupa tilbúnar máltíðir. Einnig eru nokkur stök smáhýsi hluti af ferðaþjónustunni í Keldunesi.
Í félagsheimilinu Skúlagarði er einnig rekin ferðaþjónusta með gistingu og veitingum.
Í sveitinni er auk þess bændagisting á nokkrum bæjum.

Almennar veiðireglur:
Veiðileyfi skal bera á sér við veiðarnar og sýna veiðiverði, sé þess óskað. Eingöngu er leyft að veiða á flugu samkvæmt veiða/sleppa aðferð.

Óheimilt er að aka bifreiðum utan vegaslóða, yfir gróið land, eða þar sem skemmdir geta hlotist af. Öll meðferð skotvopna er stranglega bönnuð. Þegar tveir eru um stöng, skulu þeir vera á sama veiðisvæði og einungis annar má veiða í einu. Sé brotið gegn einhverri af framangreindur reglum, eða óleyfilegt agn notað, varðar það tafarlausum brottrekstri úr ánni, bótalaust.

Veiðiverði er heimilt að skoða veiðarfæri og sjá til þess að ofangreindum reglum sé framfylgt. Veiðimenn eru beðnir um að ganga vel um og sýna snyrtimennsku við ána, fleygja ekki rusli og skilja ekki girni, umbúðir né annan úrgang eftir á bökkum hennar.

Veiðimanni er skylt að skila veiðiskýrslu að veiði lokinni.

Sýnum þessari náttúruperlu virðingu.


MYNDIR

Litlaá í Kelduhverfi | Keldunesi | Sími 465 2275 | litlaa@live.com